मकवानपुरको हेटौंँडा १६ मा रहेको जनप्रिय माध्यमिक विद्यालयमा कार्यरत शिक्षकलाई २ दिवसीय स्टिम तालिम हिजाेबाट शुरु भएको छ । शिक्षकहरुको पेशागत दक्षता अभिवृद्धिका लागि विद्यालयले आफ्नै लगानीमा यस्तो तालिम सञ्चालन गरेको हो ।
तालिम कार्यक्रमको पहिलो दिन काठमाडाैँ विश्वविद्यालयका सह प्राध्यापक इन्द्रमणी श्रेष्ठले स्टिम एप्रोचबाट कसरी शिक्षण गर्ने भन्ने विषयवस्तुमा केन्द्रित रहेर प्रशिक्षण दिएका हुन् । कार्यरत सम्पूर्ण शिक्षकहरु सहभागी रहेको तालिममा समस्यामूलक बालबालिकाको पहिचान र उनिहरुको सिकाइ सम्वन्धमा पनि प्रशिक्षण दिइएको थियो ।
वर्षे विदाको समय पारेर सुरु गरिएको यो तालिम २ दिनसम्म सञ्चालन हुने विद्यालयका प्रधानाध्यापक भुपेन्द्र चौलागाईले बताए । तालिमको दोस्रो दिन पनि काठमाडाैँ विश्वविद्यालयका सह प्राध्यापक इन्द्रमणी श्रेष्ठ त्यसैगरी राष्ट्रिय परीक्षा बोर्ड हेटौँडाका प्रमुख बद्री बहादुर पाठक र स्टिम एप्रोचबाट नै एम फिल उपाधी हासिल गर्दै गरेका भुपेन्द्र चौलागाईले दिने कार्यक्रम रहेको छ ।
विद्यालय व्यवस्थापन समितिका अध्यक्ष मोहनप्रसाद बस्ताकोटीको अध्यक्षतामा सम्पन्न उद्घाटन सत्रमा हेटौँडा १६ का वडाअध्यक्ष रामकृष्ण कोइरालाको प्रमुख आतिथ्यता रहेको थियो । प्रधानाध्यापक भुपेन्द्र चौलागाईले स्वागत गर्नुभएको कार्यक्रममा विव्यस सदस्य इन्द्रप्रसाद खतिवडा लगायतको आतिथ्यता रहेको थियो । तालिमले शिक्षण सिकाइमा थप प्रभावकारी ल्याउने तालिममा सहभागी शिक्षकहरुले बताएका छन् ।
यता जनप्रिय माविले बालबालिकाको सर्वाङ्गीण विकासका लागि क्रियशन क्याम्पको तेस्रो शृङ्खला आइतबारदेखि सञ्चालन गर्ने भएको छ । क्रियशन क्याम्पमा साहित्य, बौद्धिकता, उद्घोषण, गायन तथा सङ्गीत र खेलकुद विधाका प्रशिक्षणहरु सञ्चालन हुनेछन् । बालबालिकाले आफ्नो रुची अनुसारका विधा छनौट गरी दक्ष प्रशिक्षकबाट तालिम पाउने प्रधानाध्यापक चौलागाईले बताए । विगतका वर्षहरुबाटै प्रभावकारिता हासिल गरेको यो कार्यक्रम हरेक वर्ष वर्षे विदाको समयमा अतिरिक्त क्रियाकलापका रुपमा सम्पन्न हुँदै आएको छ । विभिन्न प्रतियोगिताहरुमा प्रतिस्पर्धी बालबालिका उत्पादनमा जनप्रिय माविको यो कार्यक्रम अत्यन्तै सफल रहेको शिक्षा विकास महाशाखा हेटौडाका अधिकृत हरिचन्द्र सापकोटाले बताए ।
तपाईंको प्रतिक्रिया दिनुहोस्