हेटौँडा: हेटौँडा-४ स्थित नवोदय शिशु सदनमा विद्यार्थीका रचना प्रस्तुतीको कार्यक्रम कफी हाउस सुरु भएको छ । आज माघ १२ गते सोमबारबाट सुरु कफी हाउस कार्यक्रम माघ महिनाभर सञ्चालन हुनेछ । पहिलो दिन कक्षा-५ को एउटा सेक्रसन कक्षा-८ को एउटा सेक्सनका विद्यार्थीहरुले कफी हाउसमा आफ्ना रचना प्रस्तुत गरेका छन् ।
कक्षा १ देखि कक्षा ९ सम्मका एक हजारभन्दा बढी विद्यार्थीहरूले कफी हाउस कार्यक्रममा आफ्ना सिर्जनात्मक प्रतिभा प्रस्तुत गर्ने अवसर पाउनेछन् । यस क्रममा विद्यार्थीहरूले कथा, कविता, संस्मरण, निबन्ध तथा लेखजस्ता विविध साहित्यिक रचनाहरू प्रस्तुत गर्नेछन् । करिब एक महिनाको निरन्तर मेहनतपछि विद्यार्थीहरूले आफैँले तयार पारेका पुस्तकहरू प्रकाशनयोग्य रूपमा तयार गरेका छन् । ती पुस्तकमा समावेश रचनामध्ये छनोट गरिएको एक रचना अभिभावकहरूको समेत उपस्थितिमा आयोजित कफी हाउस कार्यक्रममा प्रस्तुत गरिन्छ ।
नवोदय शिशु सदनकी सहायक प्रधानाध्यापक सचिता पाण्डेको अध्यक्षता तथा पत्रकार सुरेश श्रेष्ठको प्रमुख आतिथ्यमा कक्षा ५ को कफी हाउस कार्यक्रम सुरु गरिएको हो । त्यस्तै, कक्षा ८ को कफी हाउस कार्यक्रम सिस्नुपानी मकवानपुरका अध्यक्ष राजकुमार लामिछानेको प्रमुख आतिथ्यमा सम्पन्न भयो । कार्यक्रममा नवोदय शिशु सदनका प्रधानाध्यापक दिपेश जोशीको समेत गरिमामय उपस्थिति रहेको थियो ।
कफी हाउस कार्यक्रमलाई नवोदय शिशु सदनले आफ्ना विद्यार्थीहरूको सृजनशीलता, आत्मविश्वास र भाषिक दक्षता उजागर गर्ने आकर्षक र प्रभावकारी कार्यक्रमका रूपमा निरन्तर प्रस्तुत गर्दै आएको छ । यस कार्यक्रममा विद्यार्थीहरूले नेपाली र अङ्ग्रेजी दुवै भाषामा आफ्ना मौलिक रचनाहरू प्रस्तुत गरी बहुभाषिक क्षमताको उत्कृष्ट प्रदर्शन गरेका छन् ।
