हेटौँडा:मकवानपुरमा प्रवेश परीक्षा तयारी कक्षा एवम् ब्रिज कोर्समा भर्नाका लागि गरिने विज्ञापन तथा प्रचारमा गर्न रोक लगाइएको छ । शिक्षा विकास तथा समन्वय इकाई मकवानपुरले आइतबार सूचना जारी गर्दै यस्ता कक्षा सञ्चालन गर्र्दै आएका सरोकारवालाहरुलाई सचेत गराएको हो ।
इकाईले नेपाल सरकारको निर्णय अनुसार यस्ता कोर्सहरु सञ्चालन गर्न नपाइने हुँदा प्रचारप्रसार तथा विज्ञापन समेत नगर्न आग्रह गरेको छ । नेपाल सरकार शिक्षा, विज्ञान तथा प्रविधि मन्त्रालयले गत चैत्र १६ गते विद्यालय शिक्षा उच्च शिक्षाका विभिन्न तहमा हुँदै आएको प्रवेश परीक्षा, तयारी कक्षा एवम् ब्रिज कोर्स सञ्चालन गर्न रोक लगाए पनि माध्यमिक शिक्षा परीक्षा (एसईई) लाई लक्षित गर्दै परीक्षा केन्द्र रहेका विद्यालयहरुको बाहिर बसी यस्ता केन्द्रहरुको प्रचारप्रसार गरेको भन्ने जानकारी प्राप्त भएकोले सो कार्य नगर्न सरोकारवालाहरुलाई आग्रह गरेको इकाइका प्रमुख सुदीप गिरीले जानकारी दिनुभयो ।
यसअघि नै शिक्षा, विज्ञान तथा प्रविधि मन्त्रालयले विद्यालय तहका यस्ता कार्यक्रमले विद्यार्थीको मनोविज्ञान तथा शिक्षामा समतामूलक पहुँचमा नकारात्मक प्रभाव पार्ने र विद्यार्थीका लागि अनावश्यक आर्थिक बोझसमेत पर्ने भन्दै खारेजीको निर्णय गरेको थियो । २०८३ साल वैशाख १ गतेदेखि पूर्णरूपमा बन्द गर्नु गराउन मनत्रालयले निर्देशन समेत दिइसकेको छ ।
यस्तै उच्च शिक्षाका विभिन्न तह लक्षित कार्यक्रमहरू प्रचलित कानुनबमोजिम सञ्चालन नभएको भए बन्द गर्नसमेत निर्देशन दिँदै मन्त्रालयले प्रेस विज्ञप्तीमार्फत नै कानुनी मापदण्ड नपुर्याई सञ्चालनमा रहेका संस्थाहरुमा अनुगमन मार्फत कानुन बमोजिम कारबाहीको प्रक्रिया अगाडि बढाउन समेत सम्बन्धित जिल्ला प्रशासन कार्यालयहरूलाई अनुरोध गरिसकेको छ ।
