हेटौंडा। अधिक गर्मीका कारण मनहरी गाउ“पालिकामा रहेका विद्यालयहरुमा १० दिन विहानी कक्षा सञ्चालन हुने भएको छ । पालिकामा रहेका सामुदायिक तथा संस्थागत् विद्यालयहरु सबै विहानी कक्षा सञ्चालन गर्न पालिकाले विज्ञप्ति जारी गरेर निर्देशन दिएको हो ।
हाल गर्मीका कारण मौसम प्रतिकूल भइ बालबालिकालाई विद्यालयमा पठनपाठनमा असजिलो भएको र जनस्वास्थ्यमा समेत असर पर्ने देखिएकाले विहानी कक्षा सञ्चालन गर्न लागिएको उल्लेख छ । व्यवस्थापन समिति तथा सम्बन्धित वडा कार्यालयको समन्वयमा विद्यालय सञ्चालन कार्यतालिका तयार गरी विद्यालयको आवश्यकताअनुसार अधिकतम् १० दिनका लागि विहानी कक्षा सञ्चालन गर्न लागिएको हो । मौसमअनुकूल भए साविकबमोजिम हुने गरी विद्यालय सञ्चालन गर्न भनिएको छ ।
छिमेकी चितवनमा अधिक गर्मी बढेपछि तीन वटा पालिकाले विद्यालय बन्द गरेका छन् । भरतपुर महानगरपालिका, रत्ननगर नगरपालिका र खैरहनी नगरपालिकाले विद्यालय बन्द गराएका हुन् । अधिक गर्मीका कारण विद्यालयमा विद्यार्थीमा टाउको दुख्ने, वान्ता हुनेजस्ता समस्या देखिन थालेपछि पालिकाहरुले विद्यालय बन्द गराएका हुन् । भरतपुर महानगरपालिकाले आगामी शुक्रबारसम्म विद्यालय बन्द गरेको जनाएको छ ।
महानगरले अधिक गर्मीका कारण बुधबार, बिहीबार र शुक्रबार विद्यालय बन्द गरेको हो । महानगरले संस्थागत् तथा सामुदायिक विद्यालय बन्द गरेको हो । मन्टेश्वरी स्कुललाई समेत महानगरले बन्द गर्न आह्‌वान गरेको छ । चर्को गर्मीका कारण रत्ननगर नगरपालिका र खैरहनी नगरपालिकाले पनि सामुदायिक तथा संस्थागत् विद्यालय बन्द गर्ने निर्णय गरेका छन् । रत्ननगर र खैरहनी नगरपालिकाले बुधबार एक दिन विद्यालय बन्द गरेको छ ।
गर्मीका कारण विद्यालय जाने बालबालिका सबभन्दा बढी प्रभावित भएका पालिकाहरुले विज्ञप्तिमा जनाएका छन् । भरतपुर महानगरपालिकाले जेठ ३० सम्म र खैरहनी नगरपालिका र रत्ननगर नगरपालिकाले २८ जेठमा विद्यालय बन्द हुने सूचना जारी गरी अभिभावकलाई जानकारी गराएको बताएका छन् । महानगर शैक्षिक प्रशासन महाशाखा प्रमुख सुवासचन्द्र आचार्यले गर्मीले बालबालिका बिरामी पर्न थालेको जानकारी र अभिभावकबाट पनि गुनासो आएपछि विद्यालय बन्द गरिएको बताए ।
विद्यालय बिदा दिन बालबालिकालाई घरबाहिर हिँडडुल गर्न नदिन, नदीपोखरीमा पौडी खेल्न जान नदिन र माछा मार्ने काममा संलग्न हुन नदिन पनि आग्रह गरिएको आचार्यले बताए । उनले भने–हालको बिदाबाट बालबालिकाको पढाइलाई असर पर्दैन । तीन दिन हालको बिदाको सदुपयोग हुन्छ, बर्खे बिदाको समय कटौती गरिन्छ । आचार्यले भने–अधिक गर्मी भएकै कारण बिदा गर्नुपरेको हो ।
खैरहनी नगरपालिका प्रमुख प्रशासकीय अधिकृत विष्णुप्रसाद शर्माले नगर क्षेत्रका सबै विद्यालयमा २८ गते बिदा दिइएको बताए । उनले भने–गर्मीका कारण बालबालिकाको स्वास्थ्यमा असर पर्ने देखिएकाले खैरहनी नगरपालिकाले सबै विद्यालयहरु एक दिन बन्द गरिएको हो । उनका अनुसार एकदिन बिदा बर्खे बिदामा कट्टा गरिनेछ ।
रत्ननगर नगरपालिका शिक्षा अधिकृत नारायणप्रसाद वाग्लेका अनुसार गर्मीले सिकाइ क्रियाकलाप र बालबालिकाको स्वास्थ्यमा प्रतिकूल असर पर्ने देखिएका कारण एक दिन सबै किसिमका सामुदायिक तथा संस्थागत् विद्यालय बन्द गरिएको छ । मंगलबार चितवनको अधिकतम् तापक्रम ३८ डिग्री सेल्सियस पुगेको थियो । चितवनका ग्रामीण भेगका प्रायः संस्थागत् तथा सामुदायिक विद्यालयहरुले टिनको टहरामुनि बालबालिका पठनपाठन गर्दै आएका छन् । कतिपय बजारका संस्थागत् विद्यालयका भवनहरु टिनले छाएको पाइन्छ । जसका कारण अधिक गर्मीमा विद्यालय बन्द गर्नुपर्ने अवस्था आइरहेको छ