हेटौँडा-४, हेटौँडा नगरका सामुदायिक विद्यालयले आइतबारबाट विद्यार्थी भर्ना अभियान थालेका छन् । नयाँ शैक्षिक सत्र २०८१ का लागि सामुदायिक विद्यालयमा विद्यार्थी सङ्ख्या वृद्धि गर्न भर्ना अभियान थालिएको हो । भुटनदेवी माध्यमिक विद्यालयले आइतबारबाट विद्यार्थी भर्ना अभियान सुरु गरेको छ । विद्यालयका प्रधानाध्यापक माधव प्रसाद दाहालले विद्यालयमा विद्यार्थी सङ्ख्या वृद्धि गर्न अभियान सुरु गरेको जानकारी दिनुभयो । हेटाैँडा उपमहानगरपालिका वडा नम्बर ४ का वडा अध्यक्ष तथा भुटनदेवी माध्यमिक विद्यालय व्यवस्थापन समितिका अध्यक्षसमेत रहेका नवीन सिग्गदेलको पहलमा घर दैलो कार्यक्रम गरिएको छ । नेपाली र अङ्ग्रेजी दुवै माध्यमबाट पठनपाठन सुरु भएकाले त्यसको सन्देश दिन पनि भर्ना अभियान घरदैलो गर्नु परेको बताइन्छ । अङ्ग्रेजी र नेपाली दुवै भाषामा कक्षा सञ्चालन भएकाले जानकारी दिनका लागि पनि अभियानलाई केन्द्रित गर्नु परेको प्रअ दहालको भनाइ छ ।
त्यस्तै श्रमिक माध्यमिक विद्यालयले पनि विद्यालयमा विद्यार्थी सङ्ख्या वृद्धि गर्न अभियान सुरु गरेको प्रधानाध्यापक श्रीराम दाहालले जानकारी दिनुभयो । गत वर्ष अभियानपछि २०० जनाभन्दा बढी नयाँ विद्यार्थी विद्यालयमा थपिएका थिए । यस वर्ष पनि विद्यालयले नयाँ विद्यार्थी तान्ने योजना बनाएको छ ।
हेटौँडा–४ मा रहेकाे आधुनिकका प्रधानाध्यापक रामसागर गुरागाईंले विद्यालयले नयाँ शैली अपनाएर आफ्नो विद्यालयमा विद्यार्थी आकर्षित गर्ने योजना बनाएको बताउनुभयो । अघिल्लो वर्षको भर्ना अभियान पनि उत्तिकै प्रभावकारी भएको बताइन्छ । नगर तथा जिल्लाका अन्य माध्यमिक विद्यालयले पनि भर्ना अभियान सुरु गरेका छन् ।
