काठमाडौँ । भक्तपुरमा स्थापना हुने ख्वप विश्वविद्यालयको विधेयकको मस्यौदा संसदमा दर्ता गर्ने प्रक्रिया अघि बढेकाे छ ।
सरकारको लगानी विना ख्वप विश्वविद्यालय चलाउने गरी विधेयकको मस्यौदा अघि बढाइएको स्रोतले जनाएको छ ।
शिक्षा मन्त्रालयले विधेयक संसद पठाउनु अघि सहमतिको लागि बुधबार अर्थ मन्त्रालय पठाएको हो । अर्थबाट फिर्ता भएपछि रायको लागि कानुन न्याय तथा संसदीय मामिला मन्त्रालयमा पठाइनेछ । मन्त्रालयका अनुसार ख्वप विश्वविद्यालय सम्बन्धन नबाँड्ने, कुलपति प्रधानमन्त्री नहुने, बोर्ड अफ ट्रष्टिजको प्रावधान हुने र ट्रष्टिजमा भक्तपुर नगरपालिकाको प्रतिनिधि हुने प्रावधान राखिएको छ । भक्तपुर नगरपालिकाले सञ्चालन गरेको ख्वप इञ्जिनियरिङ कलेज, ख्वप कलेज अफ इञ्जिनियरिङ, ख्वप कलेज, ख्वप कलेज अफ ललाई समेटेर विश्वविद्यालय बनाउन खोजिएको हो । यी कलेजहरुमा त्रिभुवन विश्वविद्यालय र पूर्वाञ्चल विश्वविद्यालयका कार्यक्रम सञ्चालन गरिएको छ ।
भक्तपुर नगरपालिकाले आफैले सञ्चालन गर्ने गरी विश्वविद्यालयको विधेयकको मस्यौदा हुनु पर्ने प्रस्ताव गरेको थियो । संविधानले विद्यालय तह सम्मको अधिकार मात्रै स्थानीय तहलाई दिएको भन्दै मन्त्रालयले अडान राखेपछि बोर्ड अफ ट्रष्टिजमा नगरपालिकाको प्रतिनिधि हुने गरी सहमति भएको हो।
