हेटौंडा । विद्यार्थीलाई जनप्रतिनिधिले गर्ने कामको बारेमा जानकारी गराउने उद्देश्यले हेटौंडा–९ मा रहेको हेटौंडा मोडर्न इङ्लिस माध्यमिक विद्यालयमा ‘जनप्रतिनिधिसँग बालबालिका’ कार्यक्रम शुक्रबार सम्पन्न भएकाे छ । हेटौंडा मोडर्न बाल क्लबका अध्यक्ष रिजन अधिकारीको अध्यक्षतामा भएको कार्यक्रममा हेटौंडा उपमहानगरपालिका ९ नम्वर वडाध्यक्ष सुकराम केसीको प्रमुख आतिथ्य रहेको थियो ।
कार्यक्रममा प्रमुख अतिथि रहेका वडाध्यक्ष केसीले हेटौंडा ९ नम्वर वडालाई नगरको नमूना वडाको रुपमा विकास गर्ने बताए । कार्यक्रममा सहभागिता जनाएका विद्यार्थीको प्रश्नको उत्तर दिँदै वडाध्यक्ष केसीले भने –‘टोल विकास संस्थालाई अग्रसर गराउँदै हेटोंडामा रहेको १९ वटा वडामध्ये नौ नम्वरलाई नमूना वडाको रुपमा स्थापित गर्ने छु ।’ नौँ नम्वर वडालाई लागूऔषध मुक्त वडाको रुपमा घोषणा गर्ने उनले बताए ।
विद्यार्थीले सोधेका प्रश्नका जवाफ वडाध्यक्ष केसीले दिएका थिए । कार्यक्रममा लागूपदार्थ दुर्व्यसन सम्बन्धी विषयमा इलाका प्रहरी कार्यालय पशुपतिनगरका इन्चार्ज तथा प्रहरी निरीक्षक दिनेश कुँवरले सहजीकरण गरेका थिए ।
विद्यार्थीलाई स्थानीय तहले गरेको काम, योजना तर्जुमा, बजेट विनियोजन, स्थानीय सरकार कसरी अगाडि बढिरहेको छ, स्थानीय तहबाट प्रवाह हुने सेवाको बारेमा जानकारी गराउने उद्देश्यले कार्यक्रम आयोजना गरेको विद्यालयका प्रिन्सिपल सुदिप बर्तौलाले जानकारी दिए ।
कार्यक्रममा कक्षा ७ देखि १० सम्म अध्ययनरत विद्यार्थीहरुको सहभागिता रहेको थियो । कार्यक्रममा ९ नम्वर वडा सदस्य तथा बालमैत्री सम्पर्क व्यक्ति कमला पौडेल, विद्यालयका संस्थापक श्यामकृष्ण खतिवडा, संस्थागत विद्यालय शिक्षक संगठन (इस्टु) राष्ट्रिय समितिका उपाध्यक्ष दिपक गौतम, नीजि विद्यालय शिक्षक अभिभावक संघकी अध्यक्ष रमिला सापकोटा, ९ नम्वर वडा बालमैत्री सहजकर्ता आशिष खतिवडालगायतको आतिथ्य रहेको थियो ।