हेटौँडा: विद्यालयमा कार्यरत नृत्य प्रशिक्षकहरुसँग शनिबार अन्तरक्रिया भएको छ । निजी तथा आवासीय विद्यालय अर्गनाइजेशन नेपाल (प्याव्सन) हेटौँडा उपमहानगर समितिको आयोजनामा अन्तरक्रिया भएको हो ।
अन्तरक्रियामा २० वटा विद्यालयका नृत्य प्रशिक्षकको सहभागिता रहेको थियो । प्याव्सन हेटौँडा उपमहानगर समितिका अध्यक्ष रामकुमार श्रेष्ठको सभाध्यक्षतामा भएको अन्तरक्रियामा सहभागी प्रशिक्षकहरुले नृत्य कलाको प्रवद्र्धनमा संस्थागत विद्यालयहरुको साथ र सहकार्य प्रशंसनीय रहेको बताएका छन् । उनीहरुले रोजगारीको अवसर समेत सिर्जना हुनु उल्लेखनीय भएको बताए । नृत्य कलाकार संघका अध्यक्ष लाल बहादुर गुरुङले धेरै लामो समयदेखि हेटौँडाका विद्यालयहरुमा नृत्य प्रशिक्षण भइरहेको उल्लेख गर्नुहुँदै विद्यालय तहमा हेटौँडालाई राष्ट्रियस्तरको नृत्य प्रतियोगितासम्म पुर्याएर उत्कृष्ट बनाउन नसकेकोमा भने दुख व्यक्त गर्नुभयो ।
नृत्यका लागि गरिएको लगानी खेर त गइरहेको छैन भन्दै उहाँले अबको दिनमा नृत्यतर्फ राष्ट्रियस्तरमा हेटौँडाका विद्यार्थीको राम्रो प्रस्तुतीको अपेक्षा गर्नुभयो । नृत्य प्रशिक्षक अमित क्षेत्रीले बालबालिकालाई नृत्य प्रशिक्षण गराउँदै गर्दा प्रशिक्षकको समेत नृत्य कलाकारका रुपमा निखारता आएको बताउनु भयो ।
नृत्य प्रतियोगिताका लागि विद्यालयमा पर्याप्त तयारीको समय प्राप्त हुन नसकेकोमा प्रशिक्षकहरुले गुनासो गरेका थिए । दुई साताअघि मात्रै पनि प्याव्सन हेटौँडा उपमहानगर समितिको आयोजनामा नृत्य प्रतियोगिता भएको थियो । प्रतियोगितामा सहभागी मध्ये ३ जनालाई उत्कृष्ट नृत्यकला प्रस्तुत गरिएको भनी पुरस्कृत गरिएको थियो ।
अन्तरक्रियाको क्रममा नृत्य प्रशिक्षकहरुको उचित सम्मान हुनुपर्ने, स्थानीयस्तरको विज्ञ नृत्य कलाकारहरुलाई निर्णायकहरुको जिम्मा दिनुपर्ने, बालबालिकालाई धेरै भन्दा धेरै अवसर सिर्जना गर्नुपर्ने, हरेक कार्यक्रम आयोजना गर्नुअघि आचारसंहिता र नियम बनाएर अघि बढ्नुपर्ने, प्याब्सन र प्रशिक्षकहरुका बीचमा समन्वयात्मक सहकार्य हुनुपर्ने र समग्रमा हेटौँडाको नृत्य समुदायलाई विश्वसनीय र गुणस्तरीय बनाउँदै अघि बढ्नुपर्ने निष्कर्ष निकालिएको प्याव्सन हेटौँडा उपमहानगर समितिका उपाध्यक्ष श्यामकुमार बानियाँले जानकारी दिनुभयो ।