हेटौंडा: नवसर्जक साहित्य चौतारी नेपाल केन्द्रीय समिति, हेटौंडाको आयोजनामा आगामी फागुन ९ र १० गते हेटौंडामा दोस्रो राष्ट्रिय नवसर्जक उत्सव २०८१ हुने भएको छ । समितिका संस्थापक/संरक्षक दीपक गौतमले शनिबार पत्रकार सम्मेलनमार्फत् बागमती प्रदेशको राजधानी हेटौंडालाई साहित्यिक पर्यटनको केन्द्र बनाउने उद्देश्यले उत्सव आयोजना गर्न लागेको जानकारी दिनुुुभयो ।

पहिलो दिन सिर्जनात्मक लेखन कार्यशाला हुनेछ । जसअन्तर्गत मुक्तक, गजल, गद्य कविता, कथा, नाटक, निबन्ध (यात्रा संस्मरण), चित्रकला र लोकलयमा कविता लेखन गरी ८ विधामा कार्यशाला हुने उहाँले बताउनुभयो । दोस्रो दिन बहस, स्रष्टा सम्मान, राष्ट्रव्यापी गजल तथा रचना वाचन कार्यक्रम हुनेछ ।

नवप्रतिभा प्रवद्र्धनमा विद्यालय र स्थानीय सरकार विषयक बहस हुने उहाँले जानकारी दिनुभयो । राष्ट्रव्यापी नवसर्जक (२५ वर्ष मुनिका) गजल प्रतियोगितामा उत्कृष्ट ३ जनालाई नगद ७ हजार रुपैयाँसहित पुरस्कृत गरिने गौतमले बताउनुभयो । ७ प्रदेशका ७ नवसर्जक प्रतिभालाई ७ हजार ७ सय ७७ रुपैयाँ नगदसहित प्रादेशिक नवप्रतिभा सम्मान प्रदान गरिने र एक जना अग्रज बाल साहित्य सर्जक वा अभियन्तालाई १५ हजार ५ सय रुपैयाँ नगदसहित लोकनाथ न्यौपाने स्मृति अग्रज बालसाहित्य सम्मान समर्पण गरिने संरक्षक गौतमले जानकारी दिनुभयो ।

प्रादेशिक नवप्रतिभा सम्मान पुरस्कारका संस्थापक रमेशमोहन अधिकारी, डीबी बर्ताैला, अर्चना दाहाल, जयन्ती आचार्य, प्रभा पौडेल र रुबिना शर्मा हुनुहुन्छ । यस्तै, लोकनाथ न्यौपाने स्मृति अग्रज बालसाहित्य सम्मानका संस्थापक बिष्णुप्रसाद न्यौपाने हुनुहुन्छ । सोही दिन नवसर्जक मुक्तक वाचन, नवसर्जक प्रतिभाका रचना वाचन, कृति प्रकाशन सम्मान, उत्कृष्ट प्रदेश समिति पुरस्कार, नवप्रतिभाका सांस्कृतिक नृत्य तथा गायन र प्रथम केन्द्रीय अधिवेशन पनि हुने उहाँले बताउनुभयो ।

स्थापनाको ४ वर्षमा नै नवसर्जक साहित्य चौतारीले एक सय ५० भन्दा बढी राष्ट्रिय तथा अन्तर्राष्ट्रियस्तरका बाल कवि गोष्ठी आयोजना गरिसकेको छ । हेटौंडा उपमहानगरपालिका, हेटौंडा ४ नम्बर वडा कार्यालय र भूटनदेवी माध्यमिक विद्यालयको आर्थिक व्यवस्थापन, निजी तथा आवासीय विद्यालय अर्गनाइजेसन मकवानपुर र अन्य गैरसरकारी संस्थाको सहकार्यमा उत्सव हुन लागेको हो ।

साहित्य उत्सवमार्फत् बागमती प्रदेशको विगतदेखिको सिर्जनात्मक पहिचानलाई थप नयाँ उचाइमा र्पुयाउने विश्वास लिइएको छ । राष्ट्रियस्तरका साहित्यकारहरुको जमघट गराई हेटौंडामा नवसर्जकहरु उत्पादन गर्ने तथा पठन र लेखन संस्कृतिको विकास गरिने उद्देश्य रहेको संयोजक गौतमको भनाइ छ । कार्यक्रममा सातै प्रदेशका करिब ५० र हेटौंडा उपमहानगरपालिकाका सामुदायिक तथा निजी विद्यालयका करिब २ सय ५० जना नवसर्जक विद्यार्थी, साहित्यसेवी तथा साहित्यकार एक सय जना, शिक्षक ५० जनासहित करिब ४ सय जनाको सहभागिता रहनेछ ।