हेटौँडा : रोटरी क्लब अफ हेटौँडाले मकवानपुरको मनहरी गाउँपालिका–९, रजैयास्थित युवा वर्ष गंगा आधारभूत विद्यालयका विद्यार्थीलाई विद्यालय पोशाक वितरण गरेको छ । आर्थिक अवस्था कमजोर रहेका विद्यार्थीलाई शैक्षिक अवसर सहज बनाउन तथा उनीहरूमा पढाइप्रतिको उत्साह बढाउने उद्देश्य राखी पोशाक वितरण गरिएको रोटरी क्लब अफ हेटौँडाका अध्यक्ष प्रमेश प्रधानले जानकारी दिनुभयो ।
विद्यालय व्यवस्थापन समितिका अध्यक्ष गोकुल मैनालीको अध्यक्षता तथा रोटरी क्लब अफ हेटौँडाका अध्यक्ष प्रमेश प्रधानको प्रमुख आतिथ्यमा पोशाक वितरण कार्यक्रम भएको हो । क्लबका अध्यक्ष प्रधानले विद्यालय शैक्षिक सहयोग अन्तर्गत विद्यालयका विद्यार्थीलाई सहयोग गरिएको र यस्तो अभियानले विद्यार्थीको आत्मविश्वास वृद्धि हुने विश्वास व्यक्त गर्नु भयो । विद्यालय पोशाक अभावकै कारण कयौँ विद्यार्थी नियमित कक्षामा उपस्थित हुन नसक्ने अवस्थालाई लक्ष्य गर्दै कुल १३२ जना विद्यार्थीलाई पोशाक वितरण गरिएको क्लबका सचिव राम बहादुर थापाले जानकारी दिनुभयो ।
विद्यालयका प्रधानाध्यापक शरदकुमार अधिकारीले विद्यालय पोशाक सहयोगका लागि रोटरी क्लब अफ हेटौंडालाई धन्यवाद दिनुभयो । कक्षा नर्सरीदेखि आठसम्म अध्ययरत १३२ जना सबै विद्यार्थीलाई न्यानो पोशाक ट्रयासुट वितरण गरिएको छ । कार्यक्रममा क्लबका पूर्वअध्यक्ष, पदाधिकारी, अभिभावक, शिक्षक, स्थानीय सरोकारवालाको उपस्थिति रहेको थियो ।