हेटौँडा, हेटौँडा–५ मा रहेको जेनिथ माध्यमिक विद्यालयको आयोजनामा भएको अन्तर विद्यालय फुटबल प्रतियोगिताको उपाधी सोलिड्यारिटी इन्टरनेशनल विद्यालयले जितेको छ । हेटौँडा उपमहानगरपालिकात्रि रहेका १० वटा संस्थागत विद्यालयले सहभागिता जनाएको प्रतियोगितामा शुक्रबार भएको फाइनल खेलमा सत्यम जेभियर्स माध्यमिक विद्यालयलाई ३–१ को गोल अन्तरले पराजित गर्दै सोलिड्यारिटीले उपाधी चुमेको हो ।
प्रतियोगितामा सङ्गमचोकमा अवस्थित ज्ञानोदय बालबाटिका माध्यमिक विद्यालय तेस्रो भएको छ । प्रतियोगितामा प्रथम, दोस्रो र तेस्रो हुने टिमलाई क्रमशः नगद ५ हजार, ३ हजार र २ हजार रुपैयाँसहित शिल्ड मेडल र प्रमाणपत्र प्रदान गरिएको थियो । यसैगरी विद्यागत तर्फ गौरभ चौधरी उत्कृष्ट गोलकिपर, सौगात देउला उत्कृष्ट खेलाडी र दिवश मुक्तान सर्वाधिक गोलकर्ता घोषित भए ।
पढाइसँगै विद्यालयले अतिरिक्त क्रियाकलापलाई जोड दिँदै नगरभित्र रहेका विद्यार्थी र विद्यालयमाझ सम्बन्ध सुधार गर्ने उद्देश्यले प्रतियोगिता आयोजना गरिएको विद्यालयका प्रिन्सिपल श्रीबहादुर कार्कीले जानकारी दिए । शुक्रबार भएको पुरस्कार वितरण कार्यक्रममा विद्यालयका प्रिन्सिपल श्रीबहादुर कार्की, समाजसेवी सञ्जय सिलवाल, आइटी विभाग प्रमुख दुर्गा सिग्देल, प्राध्यापक विकास केसी, हेटौँडा सिटी कलेजका प्रशासक अधिकृत सुमन्त सिलवाल लगायतको आतिथ्य रहेको थियो ।