हेटौँडा : मकवानपुरको मनहरी गाउँपालिका–८, सिम्पानीस्थित युनाइटेड अंग्रेजी विद्यालयले पठन संस्कृतिको विकास गर्ने उद्देश्यले पुस्तक पठक अभ्यासको थालनी गरेको छ । चाडपर्वको विदाको समय सदुपयोग गर्दै पठन संस्कृतिको विकास गर्ने उद्देश्यले विद्यार्थीलाई पुस्तक वितरण गरेको विद्यालयले पुस्तक अध्ययनपछि लिइएको परीक्षामा उत्कृष्ट ७ विद्यार्थीलाई पुरस्कृत गरेको छ ।
दसैंअघि कक्षा–८, ९ र १० का विद्यार्थीलाई ‘असल विद्यार्थी’ शीर्षकको पुस्तक दिएको थियो । १ सय ४५ जना विद्यार्थीले पुस्तक प्राप्त गरेका थिए । दसैं–तिहारको विदाको समयमा पुस्तक अध्ययन गरेका विद्यार्थीलाई गत शनिबार परीक्षा दिइएको थियो । विद्यालयले दिएको पुस्तक अध्ययन गरेका विद्यार्थीको गत शनिबार वस्तुगत परीक्षा लिएको थियो । उत्कृष्ट सात विद्यार्थीलाई सफलताका सुत्रहरु शीर्षकको एक थान पुस्तक, एक हजार रुपैयाँ नगद र प्रमाणपत्र प्रदान गरिएको विद्यालयका अध्यक्ष रामचन्द्र उप्रेतीले जानकारी दिनुभयो । पुस्तक पठनपछिको परीक्षामा कक्षा–९ बाट इन्द्र ओझा, सार्थक उप्रेती, कृष्ण अधिकारी र निश्चल भण्डारी, कक्षा–१० बाट रिजवान मियाँ, ऋतु खतिवडा र जिविषा राई उत्कृष्ट घोषित भएका छन् ।
‘हामी पठन संस्कृतिको विकास गर्ने उद्देश्यले विद्यार्थीलाई उनीहरुको शैक्षिक स्तरअनुसारका पाठ्य सामग्री उपलब्ध गराउने तयारीमा छौं । विद्यालयमा पुस्तक अध्ययनपछि लिइएको परीक्षामा उत्कृष्ट ७ विद्यार्थीलाई पुरस्कृत गरेको छ । व्यवस्थित पुस्तकालय निर्माण गरिरहेका छौं’, विद्यालयका अध्यक्ष उप्रेतीले भन्नुभयो ।
विद्यालयका प्रिन्सीपल विष्णुहरि सुवेदीले विद्यार्थीमा पठन अभ्यास कमजोर बन्दै गएको सन्दर्भमा पढ्नुपर्छ भन्ने सोचाई विकास गराउन यस किसिमको अभ्यास गरिएको र आगामी दिनमा पनि यसलाई निरन्तरता दिइने बताउनुभयो । १० कक्षासम्म पठनपाठन हुने विद्यालयमा १ हजार २ सय विद्यार्थी अध्ययनरत छन् ।