हेटौंडा : दशैं, तिहार, छठजस्ता चाडपर्वको लामो बिदा सकिएसँगै मकवानपुरका १० वटै स्थानीय तहका अधिकांश विद्यालयहरु मंगलबारदेखि सञ्चालनमा आएका छन् । केही विद्यालयहरु भने बुधबारबाट मात्र सुचारु हुने भएका छन् । हेटौंडा उपमहानगरपालिकाका केही सामुदायिक र संस्थागत विद्यालयहरू मंगलबारदेखि खुलेका छन् भने केही विद्यालय तथा क्याम्पस आज बुधबारदेखि सञ्चालनमा आउने भएका छन् । दशैं र तिहारको बिचमा पनि केही विद्यालयहरुले नियमित पठनपाठनसँगै सीपमूलक तथा जीवन उपयोगी शिक्षा सञ्चालन गरेका थिए ।

उपमहानगरपालिकाको शिक्षा विकास महाशाखाका अधिकृत रमेश बिडारीका अनुसार हेटौंडाका केही विद्यालयहरुमा मधेश प्रदेशका विद्यार्थीहरू बढी भएकाले मंगलबार छठ पर्वका लागि बिदा दिइएको हो । उपमहानगरपालिकामा हाल ७१ वटा सामुदायिक र ५२ वटा संस्थागत विद्यालय रहेको भए पनि मंगलबार सञ्चालनमा रहेका विद्यालयको संख्या ४८ छ । सामुदायिक विद्यालयमा करिब ३० हजार र संस्थागत विद्यालयमा करिब २७ हजार विद्यार्थी अध्ययनरत छन् ।

मकवानपुरगढी गाउँपालिकाका विद्यालयहरु पनि मंगलबारदेखि सञ्चालनमा आएका छन् । चाडपर्व अवधिभर बन्द रहेका ३५ वटा सामुदायिक विद्यालयमा हाल ५ हजार १७३ विद्यार्थी अध्ययनरत छन् । पालिकाको क्यालेण्डरअनुसार दोस्रो त्रैमासिक परीक्षा मंसिर २६ देखि पुस ४ गतेसम्म सञ्चालन हुने पालिकाका शिक्षा शाखा प्रमुख रामबहादुर घलानले जानकारी दिनुभयो ।

इन्द्रसरोवर गाउँपालिकाका २० विद्यालय मंगलबारदेखि खुलेका छन् । पालिकामा २ हजार एक सय जना विद्यार्थी अध्ययनरत छन् । गाउँपालिकाको शिक्षा शाखा प्रमुख धर्मानन्द पन्तका अनुसार दोस्रो त्रैमासिक परीक्षा पुस १ देखि ८ गतेसम्म हुनेछ ।

थाहा नगरपालिकाका विद्यालयहरू पनि मंगलबारदेखि सञ्चालनमा आएका छन् । नगरपालिकाको शिक्षा शाखा प्रमुख माधवविक्रम मल्लका अनुसार पालिकाले दशैं–तिहारबिचको अवधिमा समेत विद्यालय सञ्चालन गरेको थियो । पालिकाभित्रका ११ संस्थागत र ५२ सामुदायिक विद्यालयमा करिब ९ हजार विद्यार्थी अध्ययनरत छन् । दोस्रो त्रैमासिक परीक्षा मंसिर अन्तिम सातामा सञ्चालन गरिनेछ ।

बकैया गाउँपालिकाका केही विद्यालय मंगलबारबाट खुलेका छन् भने केही आज बुधबारबाट खुल्दैछन् । पालिकाले दशैंपश्चात् विद्यालयहरुमा नियमित पठनपाठन सञ्चालन गरेको थियो । यस वर्ष पालिकाले शैक्षिक क्यालेण्डर नबनाएकाले विद्यालयहरु फरक–फरक मितिमा सञ्चालनमा आएका हुन् । पालिकाका ७६ सामुदायिक र ४ संस्थागत विद्यालयमा करिब १० हजार विद्यार्थी अध्ययनरत छन् । दोस्रो त्रैमासिक परीक्षा मिति विद्यालयले आफैं निर्धारण गर्नेछन् ।

राक्सिराङ गाउँपालिकाका विद्यालयहरू पनि मंगलबारदेखि सञ्चालनमा आएका छन् । चाडपर्व अवधिमा विद्यालयहरु बन्द रहेका थिए । एक विद्यालयका शिक्षकका अनुसार दोस्रो त्रैमासिक परीक्षा पुस २ गतेदेखि शैक्षिक क्यालेण्डर अनुसार सञ्चालन हुनेछ ।

बागमती गाउँपालिकाका विद्यालयहरू पनि मंगलबारदेखि सञ्चालनमा आएका छन् । ५० वटा सामुदायिक विद्यालयमा करिब ७ हजार ७० विद्यार्थी अध्ययनरत छन् । एक शिक्षकका अनुसार दोस्रो त्रैमासिक परीक्षा शैक्षिक क्यालेण्डर अनुसार मंसिर २१ गतेदेखि २८ गतेसम्म हुनेछ ।

कैलाश गाउँपालिकाका विद्यालय पनि पूर्णरुपमा सञ्चालनमा आएका छन् । चाडपर्वको बेलामा विद्यालय पूर्णरुपमा बन्द रहेको थियो । पालिकाको शिक्षा शाखा प्रमुख दीपेन्द्र अधिकारीका अनुसार पालिकाभित्र ४३ सामुदायिक विद्यालयमा ४ हजार ८९२ विद्यार्थी अध्ययनरत छन् । दोस्रो त्रैमासिक परीक्षा मंसिर २१ देखि २८ गतेसम्म सञ्चालन हुनेछ ।

भीमफेदी गाउँपालिकाका विद्यालयहरू पनि मंगलबारदेखि सुचारु भएका छन् । मनहरी गाउँपालिकाका सबै विद्यालयहरु पनि सञ्चालनमा आएका छन् । दशैंपश्चात् मनहरीका विद्यालयहरु सञ्चालनमा आएका थिए । पालिकाभित्र ३२ सामुदायिक र ८ संस्थागत विद्यालयमा करिब १२ हजार विद्यार्थी अध्ययनरत छन् । विद्यालयहरु पालिकाको शैक्षिक क्यालेण्डर अनुसार नै सञ्चालन भइरहेको शिक्षा शाखाले जनाएको छ ।